امریکا ایران مذاکرات میں پیش رفت، عالمی منڈی میں تیل کی قیمتوں میں کمی

امریکا اور ایران کے درمیان ہونے والے مذاکرات میں مثبت پیش رفت کے بعد عالمی منڈی میں تیل کی قیمتوں میں نمایاں کمی ریکارڈ کی گئی ہے، جسے عالمی معیشت کے لیے ایک مثبت اشارہ قرار دیا جا رہا ہے۔

رپورٹس کے مطابق برینٹ خام تیل کی فی بیرل قیمت میں ایک ڈالر سے زائد کمی ہوئی، جس کے بعد قیمت 79.44 ڈالر فی بیرل تک آ گئی۔

ماہرین کے مطابق تیل کی قیمتوں میں کمی کی بنیادی وجہ ایران اور امریکا کے درمیان مذاکرات میں بہتری اور خطے میں کشیدگی میں کمی کی امید ہے۔

تجزیہ کاروں کا کہنا ہے کہ مشرق وسطیٰ میں سیاسی استحکام عالمی توانائی مارکیٹ پر براہ راست اثر انداز ہوتا ہے، اسی لیے مذاکرات میں مثبت پیش رفت نے سرمایہ کاروں کے اعتماد کو بڑھایا۔

واضح رہے کہ سوئٹزرلینڈ میں ایران امریکا مذاکرات کے بعد قطر اور پاکستان نے ایک مشترکہ اعلامیہ بھی جاری کیا ہے۔

اعلامیے کے مطابق فریقین نے مذاکرات کی نگرانی کے لیے ایک اعلیٰ سطحی کمیٹی کے قیام پر اتفاق کیا ہے، جو آئندہ پیش رفت کا جائزہ لے گی۔

مزید برآں، حتمی معاہدے تک پہنچنے کے لیے 60 روزہ روڈ میپ بھی منظور کر لیا گیا ہے، جس سے خطے میں امن اور معاشی استحکام کی امیدیں مزید بڑھ گئی ہیں۔